News Categories: BQK

Banka Qendrore e Republikës së Kosovës, ka mirëpritur raportin e publikuar për Kosovën nga Komisioni Evropian, i cili njeh masat e ndërmarra nga ana e BQK-së në rritjen e vazhdueshme dhe qëndrueshmërinë e sektorit financiar.

Raporti ka vlerësuar se në gjysmën e parë të këtij viti, kreditë shënuan rritje prej 17%. Rritja e kredive u lehtësua nga normat e ulëta të interesit, rritja e vazhdueshme e depozitave, përmirësimi i zbatimit të kontratave dhe rritja e garancive të dhëna nga Fondi Kosovar për Garanci të Kredive (FKGK) për kreditimin e ndërmarrjeve mikro, të vogla dhe të mesme për të zbutur ndikimin e krizës. Gjithashtu, norma mesatare e kredive joperformuese në gjysmën e parë të vitit 2022, ishte 2.1% dhe kjo përqindje u mbajt falë rritjes së lartë të kredive.

Kosova sipas raportit, në mënyrë të moderuar është e përgatitur në fushën e shërbimeve financiare. Gjithashtu, Raporti vlerëson progresin edhe në adresimin e çështjes së automjeteve të pasiguruara dhe të paregjistruara.

Banka Qendrore e Kosovës ka vazhduar të harmonizojë kornizën e saj ligjore me kërkesat e Basel III, sa i përket kapitalit dhe menaxhimit të rrezikut.

Sektori financiar mbetet i qëndrueshëm, pavarësisht sfidave ekonomike globale për shkak të niveleve të larta të kapitalizimit të sektorit bankar me pronësi të huaj. Në përgjithësi, raporti i kapitalizimit të bankave, mbeti i qëndrueshëm dhe shumë mbi nivelin minimal të kërkuar të mjaftueshmërisë së kapitalit prej 12%.

Raporti flet edhe për funksionalizimin e Bordit të BQK-së me emërimin e 3 anëtarëve joekzekutivë, duke potencuar gjithashtu domosdoshmërinë  e ruajtjes së pavarësisë së BQK-së.

Raporti gjithashtu ka përmendur edhe moskrijimin e autoritetit të pavarur të rikuperimit dhe përmbylljes, i cili varet nga ndryshimet që duhet t’i bëhen ligjit për bankat, përmes të cilit ky funksion i caktohet Bankës Qendrore dhe duhet të sigurohet që autoriteti të ketë pavarësi funksionale brenda BQK-së.

Gjithashtu, Raporti përfshinë edhe zhvillimet në sektorin e sigurimeve dhe atë të pensioneve, si dhe në zbatimin e vazhdueshëm të masave të Solvencës I dhe fillimin e zbatimin gradual të një udhërrëfyesi 5 vjeçar për zbatimin e masave të Solvencës II.

Sa i përket sigurimeve dhe pensioneve, Banka Qendrore duhet të rritë rolin mbikëqyrës në industrinë e sigurimeve. Në lidhje me liberalizimin e çmimeve në tregun e sigurimeve të detyrueshme, Komisioni ka kërkuar që çfarëdo proces i liberalizimit të çmimeve, duhet të fillojë në mënyrë graduale me qëllim të shmangies së çrregullimeve në treg.

Komisioni Evropian ka sugjeruar që vitin e ardhshëm të harmonizohet më tej korniza ligjore e Kosovës me Direktivën e BE-së për Shërbimet e Pagesave 2, rritjen e përpjekjeve për të luftuar krimin ekonomik dhe financiar, si dhe përafrimin e Ligjit për Parandalimin e Pastrimit të Parave dhe Financimit të Terrorizmit me aktet (aquis) të BE-së, pastaj forcimin e bashkëpunimit ndërinstitucional në luftën kundër krimit ekonomik dhe financiar.

Në lidhje me mbrojtjen e konsumatorit, theksohet se Divizioni i Ankesave të Shfrytëzuesve të Shërbimeve Financiare  në BQK, trajton shumicën e ankesave në lidhje me shërbimet financiare.

Gjithashtu, theksohet se është bërë progres në mbledhjen dhe raportimin e disa të dhënave në Eurostat, megjithatë nevojiten përpjekje të mëtejshme për të adresuar mospërputhjet metodologjike në llogaritë kombëtare. Statistikat mujore për tregtinë ndërkombëtare të mallrave janë raportuar në Eurostat. Të dhënat e Bilancit të Pagesave janë përpiluar nga Banka Qendrore dhe janë përgjithësisht në pajtueshmëri me aktet (aquis) të BE-së.

Raportin e plotë të publikuar nga Komisioni Evropian në gjuhën angleze, mund ta gjeni në vegëzën:

https://neighbourhood-enlargement.ec.europa.eu/kosovo-report-2022_en

Banka Qendrore e Republikës së Kosovës, shënuar ka Ditën Ndërkombëtare të Kursimeve, përmes një ligjërate me nxënësit e Shkollës së Mesme Ekonomike “Hoxhë Kadri Prishtina”.

Koordinatori për Funksione të Përgjithshme, Labinot Preniqi, ka thënë se qëllimi i organizimit të aktiviteteve edukative nga BQK-ja, ka për qëllim për të nxitur të rinjtë që të krijojnë shprehinë e të kursyerit dhe të ndërgjegjësohen rreth menaxhimit të duhur të financave personale të tyre, pasi zhvillimi i shprehive të kursimeve, do të thotë që në të ardhmen të kesh stabilitet të financave personale.

“E dimë që secili prej nesh pothuajse çdo ditë gjendet në një situatë që duhet të marrë vendim se si do t’i shpenzojmë paratë, dhe kjo nuk është e lehtë sepse gjithmonë kemi nevoja dhe dëshira pafund, ndërsa kemi para apo mjete financiare të limituara, diçka duhet të përzgjedhim e diçka duhet të sakrifikojmë. Sa më shumë t’i kushtojmë rëndësi shprehisë së kursimeve në të ardhmen, dhe sa më te kujdesshëm te jemi rreth menaxhimit të financave personale, aq më të lehtë do ta kemi marrjen e këtyre vendimeve”, ka thënë Preniqi para të pranishmëve.

Ndërsa, shefi i Kabinetit të Guvernatorit, Nexhat Miftari, ka prezantuar rolin e BQK-së në ekonomi, ndërkaq nxënësit dhe stafi akademik, parashtruan pyetje rreth funksionimit të sektorit financiar në përgjithësi.

Dita Botërore e Kursimeve u themelua më 31 tetor 1924, gjatë Kongresit të Parë Ndërkombëtar të Bankave të Kursimeve në Milano të Italisë, në të cilin u vendos që Dita Botërore e Kursimeve, të jetë një ditë e dedikuar për promovimin e kursimeve në të gjithë botën.

Kjo ditë shënohet çdo vit, në mënyrë tradicionale nga BQK-ja.

Në këtë ngjarje, BQK  ka shpallur konkurs për Ese për të gjithë nxënësit e shkollave te mesme te Kosovës, dhe ka ftuar të marrin pjesë në konkursin për ese, që do të ketë si temë kursimet dhe që do të jetë për nxënësit e klasave X-XII të shkollave të arsimit të mesëm të lartë të Kosovës.

Konkursi do të jetë i hapur një muaj dhe pas mbylljes Komisioni përzgjedhës do t’i vlerësojë dhe do t’i përzgjedhë 10 nga punimet më të mira, të cilat do të shpërblehen me një shumë monetare.

Guvernatori i Bankës Qendrore të Republikës së Kosovës, Fehmi Mehmeti dhe shefi i misionit të Fondit Monetar Ndërkombëtar për Kosovën, Gabriel di Bella, kanë prezantuar deklaratën përmbyllëse të misionit të FMN-së në kuadër të Artikullit IV.

Guvernatori Mehmeti ka thënë se BQK ka vazhduar të jetë e angazhuar në realizimin e detyrave të saj në mbajtjen dhe ruajtjen e një sistemi financiar stabil dhe vazhdimisht në rritje.

Ai ka thënë se sistemi financiar në Kosovë, ka vazhduar të jetë likuid dhe mirë i kapitalizuar ku në të gjithë indikatorët, ka shënuar rritje dyshifrore, duke qenë një nga faktorët e rëndësishëm në rritjen dhe zhvillimin ekonomik të vendit.

“Gjithsej mjetet e sistemit financiar në vend, më 31 gusht 2022, kanë arritur vlerën e përgjithshme prej 9.3 miliardë euro. Ndërsa, mjetet e sektorit bankar kanë vazhduar trendin e rritjes edhe gjatë vitit 2022, duke arritur vlerën rreth 6.4 miliardë euro në muajin gusht 2022, e cila paraqet një rritje vjetore prej 11.1 përqind. Në gusht 2022, vlera e përgjithshme e depozitave është në vlerë prej 5.2 miliardë euro, që paraqet një rritje vjetore prej 11.8 përqind, derisa rritja e depozitave ka vazhduar edhe gjatë muajit shtator, me një prej 12.7 përqind. Sektori bankar vazhdon të jetë i qëndrueshëm duke rritur aktivitetin kredidhënës dhe duke luajtur një rol shumë të rëndësishëm në kreditimin e ekonomisë së vendit edhe gjatë këtij viti. Vlera e portofolit kreditor të sektorit bankar në fund të gushtit 2022 ishte në shumë prej 4.2 miliardë euro, me një rritje vjetore prej 18.6 përqind, derisa norma mesatare e interesit për kredi ishte 6.0 përqind”, ka deklaruar Guvernatori.

Tutje, Guvernatori Mehmeti ka thënë se kreditë joperformuese kanë vazhduar me trendin rënës dhe sot norma e kredive joperformuese është në nivelin prej 2.1%, që është tregues dukshëm më i mirë krahasuar me vendet e regjionit apo edhe më gjerë.

Gjithashtu, sektori bankar vazhdon të jetë mirë i kapitalizuar dhe likuid, ku treguesi i mjaftueshmërisë së kapitalit për sektorin bankar shënon 16.1 përqind, që është dukshëm mbi kërkesat rregullatore prej 12 përqind, ndërsa treguesi i likuiditetit është 35.7 përqind, ngjashëm, më lartë se kërkesa rregullatore prej 25 përqind.

Para mediave, Guvernatori ka folur edhe për sektorin e sigurimeve, i cili ka pasur rezultate pozitive.

Guvernatori Mehmeti ka falënderuar përfaqësuesit e Fondit Monetar Ndërkombëtar, për kontributin dhe përkrahjen e vazhdueshme të Kosovës dhe të Bankës Qendrore të Republikës së Kosovës.

Nga ana tjetër, shefi i misionit të FMN-së për Kosovën, Gabriel di Bella, ka thënë se sektori financiar ka përballuar tronditjet që goditën ekonominë dhe një nga faktorët që kanë ndikuar, kanë qenë edhe politikat e ndjekura nga BQK-ja.

Di Bella ka shtuar se pavarësia e BQK-së është gurë themeli bazë i politikave ekonomike të Kosovës.

Në deklaratën përmbyllëse të Misionit, në kuadër të Nenit IV për vitin 2022, është kërkuar që BQK të vazhdoj të forcojë monitorimin e kreditimit dhe likuiditetit të bankave dhe ruajtja e dinamikës së mirë të Rishikimit të Stabilitetit të Sektorit Financiar 2019 (FSSR).

FMN pret që BPV-ja reale të shënojë rritje prej 3 – 4 për qind në vitin 2023 dhe inflacioni gradualisht të lehtësohet, por këto parashikime në thelb varen nga çmimet ndërkombëtare të mallrave, përfshirë energjinë.

Banka Qendrore e Republikës së Kosovës (BQK) me qëllim të përmbushjes së vizionit të saj për përmirësim të transparencës, avancimit të komunikimit me publikun, ndërgjegjësimit dhe promovimit të edukimit financiar dhe gjithëpërfshirjen financiare për të gjithë qytetarët tashmë ka ridizajnuar dhe lëshuar në përdorim web-faqen e saj.

Web-faqja e re e BQK-së shënon një hap para në përmbushjen e objektivave të përcaktuara në Planin e saj Strategjik 2024-2028, që lidhet me digjitalizimin dhe modernizimin e proceseve për të avancuar mbrojtjen e konsumatorit.

Faqja e internetit e BQK-së do të përdoret gjithashtu si një mjet komunikimi dhe bashkëpunimi ndërmjet palëve të interesuara për shkëmbimin e përvojave me BQK-në, njohurive dhe burimeve për të forcuar besimin dhe për të informuar të gjithë qytetarët në kohën më të shpejtë të mundshme.

Funksionet e reja të zhvilluara siç është kalendari dinamik i aktiviteteve, kërkimi gjeneral dhe ai specifik, filtrimi dhe kategorizimi i informacionit varësisht nga kërkesat e lexuesit, video galeria dhe Chat-boti për pyetjet dhe përgjigjet e shpeshta sigurojnë një përvojë më të thjeshtë për të gjitha audiencat, që nga përdoruesit e shërbimeve financiare, niveli akademik dhe deri tek institucionet vendore dhe ndërkombëtare.

Kjo web-faqe është zhvilluar në përputhje me standardet e sigurisë për të mbrojtur përdoruesit nga rreziqet kibernetike, duke ofruar një platformë të sigurt për të gjithë qytetarët. Gjithashtu, përmes platformës së re që pritet të shtohet së shpejti, BQK-ja përmirëson ndjeshëm përvojën e përdorueseve në portalet e Edukimit Financiar dhe atij të Krahasimit të Produkteve dhe Shërbimeve Financiare, gjë që do ndihmon konsumatorin të marrë vendime të mirëinformuara. Qasje e lehtësuar është paraparë edhe në portalet ekzistuese të Ankesave dhe të Regjistrit Kreditor.

Andaj, më këtë Banka Qendrore e Republikës së Kosovës mbetet e përkushtuar që të jetë sinonim i profesionalizimit, inovacionit teknologjik, promovimit të komunikimit, veçanërisht në hapjen e informacionit për të gjitha palët e interesuara.

Për më shumë informacion, ju lutëm vizitojeni web-faqen e re të BQK-së 🔗 https://bqk-kos.org/