Guvernatori Ismaili merr pjesë në takimin e Konstituencës së FMN-së me fokus në stabilitetin financiar dhe sfidat globale

Guvernatori i Bankës Qendrore të Republikës së Kosovës (BQK), z. Ahmet Ismaili, i cili njëherësh përfaqëson Republikën e Kosovës në Bordin e Guvernatorëve të Fondit Monetar Ndërkombëtar, mori pjesë në mbledhjen e Konstituencës së FMN-së, ku Republika e Kosovës bën pjesë së bashku me Austrinë, Çekinë, Hungarinë, Sllovakinë, Slloveninë dhe Türkiye.

Në takim u diskutua lidhur me ecurinë e realizimit të aktiviteteve, duke paraqitur një përmbledhje të aktivitetit të konstituencës sonë, si dhe mbi zhvillimet ekonomike dhe financiare, përfshirë stabilitetin financiar, ndikimet nga goditjet e jashtme, presionet inflacioniste dhe rreziqet e reja për sektorin bankar dhe ekonomitë e vendeve pjesëmarrëse. Gjithashtu, u diskutuan veprimet e mundshme për përballimin dhe zbutjen e efekteve të goditjeve të jashtme në kushtet e pasigurive të shtuara globale.

Guvernatori Ismaili shprehu mirënjohjen për bashkëpunimin dhe mbështetjen nga drejtuesit e FMN-së, ndërsa konfirmoi mbështetjen për nominimin për drejtuesin e ri të konstituences, duke vlerësuar lart punën e drejtorit aktual, mandati i të cili pritet të përfundojë në tremujorin e fundit të këtij viti.

Takimi u organizua në kuadër të Takimeve Pranverore të Fondit Monetar Ndërkombëtar dhe Bankës Botërore që po mbahen në Washington DC.