News Categories: Publikime

Sipas kalendarit të publikimeve, BQK publikoi bilancin e gjendjes, pasqyrën e BQK-së dhe asetet rezervë për mars 2024:

https://bqk-kos.org/statistikat/serite-kohore

Asetet e BQK-së në fund të muajit mars 2024 shënuan vlerën prej 1.54 miliard eurove, duke përfaqësuar rënie për 23.70 milionë euro krahasuar me muajin paraprak, kryesisht si rezultat i zvogëlimit të depozitave të Qeverisë së Republikës së Kosovës me 65.90 milionë euro, fondeve pensionale me 27.96 milionë euro, bankave komerciale me 29.42 milionë euro dhe korporatave publike jofinanciare me 4.92 milionë euro.

Në anën tjetër, është shënuar rritje në depozitat e Agjencisë Kosovare të Privatizimit me 1 milion euro dhe depozitave të afatizuara Qeverisë së Republikës së Kosovës me 100 milionë euro.

Nga gjithsej asetet, vlera e investimeve në depozita dhe letrat me vlerë jashtë vendit deri më 31 mars 2024, ishte 1.05 miliard euro. Krahasuar me muajin paraprak, investimet e BQK-së jashtë vendit në formë të depozitave dhe letrave me vlerë janë zvogëluar për 28.38 milionë euro, prej të cilave, investimet në depozita janë zvogëluar për 7.40 milionë euro, ndërsa investimet në letra me vlerë janë zvogëluar për 20.98 milionë euro.

Depozitat në BQK – deri më 31 mars 2024 ishin 1.26 miliard euro, prej të cilëve 464.52 milionë euro ishin nga Qeveria e Republikës së Kosovës, 528.60 milionë euro nga bankat komerciale, 167.82 milionë euro nga Agjencia Kosovare e Privatizimit dhe 99.61 milionë euro të tjerat.

Kapitali i BQK – deri më 31 mars 2024 ishte 107.79 milionë euro.

Asetet e rezervës ndërkombëtare – në fund të muajit mars 2024 shënuan vlerën e 1.16 miliard eurove, e cila përfaqëson rënie për 16.61 milionë euro krahasuar me muajin paraprak. Kësaj rënie kryesisht i ka kontribuar zvogëlimi i investimeve në letra me vlerë për 9.69 milionë euro dhe depozitave për 6.61 milionë euro.

Sipas kalendarit të publikimeve, BQK publikoi statistikat e bankave komerciale për muajin mars 2024:

https://bqk-kos.org/statistikat/serite-kohore

Asetet e bankave komerciale në fund të muajit mars 2024 kanë arritur vlerën në 7.50 miliardë euro, duke shënuar rritje për 110.19 milion euro, ose 1.49% krahasuar me muajin paraprak.

Kreditë bruto në fund të muajit mars kanë arritur vlerën në 5.09 miliardë euro, duke shënuar rritje për 132.0 milionë euro ose 2.66% krahasuar me muajin paraprak.

Vlera e kredive të reja në muajin mars 2024 ishte 241.20 milionë euro.

Depozitat e klientëve në mars 2024 kanë arritur vlerën prej 6.05 miliardë euro, duke shënuar rritje për 36.83 milionë euro, ose 0.61% krahasuar me muajin paraprak. Nga vlera e akumuluar e depozitave të klientëve, rreth 26.89% janë të afatizuara. Sipas sektorëve, ekonomitë familjare dominojnë me rreth 67.26% të gjithsej vlerës së depozitave (rreth 4.07 miliardë euro).

Vlera e depozitave të reja në muajin mars 2024 ishte 69.70 milionë euro.

Raporti kredi-depozita në muajin mars 2024 ishte në nivelin 84.07%.

Gjithsej kapitali i bankave komerciale në fund të muajit mars 2024 arriti vlerën në 868.56 milionë euro. Ndërsa, provizionet për kredi u zvogëluan për 1.62 milion euro apo 1.12% krahasuar me muajin paraprak duke arritur vlerën 146.10 milionë euro.

Norma mesatare e interesit në depozita në muajin mars 2024 ishte 2.71% (në janar 2024 ka qenë 2.89%).

Norma mesatare e interesit në kredi në muajin mars 2024 ishte 6.24% (në janar 2024 ka qenë 6.34%).

Margjina e normës së interesit në kredi dhe depozita në muajin mars 2024 ishte 3.53% (në janar 2024 ka qenë 3.45%).

Sipas kalendarit të publikimeve, BQK publikoi statistikat e Bilancit të Pagesave (BP) për muajin shkurt 2024:

https://bqk-kos.org/statistikat/serite-kohore

Bilanci i pagesave në shkurt 2024 u karakterizua me deficit të llogarisë rrjedhëse në vlerë prej 145.74 milionë euro, i cili tregon për një rritje të deficitit për 53.94 % ose 51.07 milionë euro krahasuar me periudhën e njëjtë të vitit të kaluar (94.67 milionë euro ishte deficiti në shkurt 2023).

Bilanci tregtar në mallra në shkurt 2024 shënoi deficit në vlerë 362.40 milionë euro, që është për 25.85% më i lartë krahasuar me periudhën e njëjtë të vitit paraprak. Eksporti për këtë periudhë shënoi vlerën 70.32 milionë euro, duke paraqitur rënie prej 3.66% krahasuar me shkurt 2023 (72.99 milionë euro ishte në shkurt 2023). Ndërsa, importi i mallrave arriti vlerën 432.72 milionë euro duke paraqitur rritje prej 19.88% krahasuar me shkurt 2023 (360.97 milionë ishte euro në shkurt 2023).

Llogaria e shërbimeve, e cila vazhdimisht ka bilanc pozitiv, në shkurt 2024 shënoi vlerën 59.82 milionë euro, e cila është për 8.70% më e lartë krahasuar me periudhën e njëjtë të vitit kaluar.
Të ardhurat parësore në shkurt 2024 shënuan bilanc pozitiv prej 20.64 milionë euro, e cila në periudhën e njëjtë të vitit të kaluar ishte 9.71 milionë euro.

Të ardhurat dytësore mbeten kontribuesi kryesor në zbutjen e deficitit të llogarisë rrjedhëse. Në shkurt 2024 kjo llogari shënoi bilanc pozitiv prej 136.19 milionë euro, e cila paraqet rritje prej 5.94% krahasuar me periudhën e njëjtë të vitit kaluar (128.55 milionë euro ishte vlera në shkurt 2023).

Remitancat janë kategoria kryesore në kuadër të ardhurave dytësore, vlera e të cilave në shkurt 2024 shënoi 85.58 milionë euro, që paraqet rritje prej 3.48 milionë euro ose 4.23% krahasuar me periudhën e njëjtë të vitit 2023.

Asetet në llogarinë financiare në shkurt 2024 kanë shënuar bilanc pozitiv prej 9.74 milionë euro, ndërsa, detyrimet financiare kanë shënuar bilanc pozitiv në vlerë prej 76.18 milionë euro.

Investimet direkte në Kosovë në shkurt 2024 shënuan vlerën 73.91 milionë euro (58.69 milionë euro ishte vlera në shkurt 2023), përderisa investimet direkte jashtë Kosovës shënuan vlerën 13.28 milionë euro (11.46 milionë euro ishte vlera në shkurt 2023).

Asetet rezervë në shkurt 2024 kanë shënuar bilanc negativ prej 9.38 milionë euro, e cila rezulton nga zvogëlimi i investimeve në letra me vlerë dhe rritja e investimeve në depozita. Në periudhën e njëjtë të vitit paraprak asetet rezervë kanë pasur bilanc pozitiv 21.78 milionë euro.

Sipas kalendarit të publikimeve, BQK publikoi bilancin e gjendjes, pasqyrën e BQK-së dhe asetet rezervë për prill 2024 :

https://bqk-kos.org/statistikat/serite-kohore

Asetet e BQK-së – në fund të muajit prill 2024 kanë arritur vlerën prej 1.64 miliardë euro, duke përfaqësuar rrije për 105.84 milionë euro krahasuar me muajin paraprak, kryesisht si rezultat i rritjes së depozitave afatizuara të Qeverisë së Republikës së Kosovës, fondeve pensionale,  korporatave publike jofinanciare, Fondit për Sigurimin e Depozitave dhe depozitave të Agjencisë Kosovare të Privatizimit. Ndërsa, janë zvogëluar depozitat e transferueshme të Qeverisë së Republikës së Kosovës si dhe depozitat e bankave komerciale.

Nga gjithsej asetet, vlera e investimeve në depozita dhe letrat me vlerë jashtë vendit deri më 30 prill 2024, ishte 1.58 miliardë euro krahasuar me muajin paraprak, e cila përfaqëson rritje prej 108.93 milionë euro. Prej tyre, investimet në depozita janë rritur për 114.69 milionë euro, ndërsa investimet në letra me vlerë janë zvogëluar për 5.76 milionë euro.

Depozitat në BQK – deri më 30 prill 2024 ishin 1.36 miliard euro, prej të cilëve 523.33 milionë euro ishin nga Qeveria e Republikës së Kosovës, 508.91 milionë euro nga bankat komerciale, 169.75 milionë euro nga Agjencia Kosovare e Privatizimit dhe 161.17 milionë euro të tjerat.

Kapitali i BQK – deri më 30 prill 2024 ishte 109.95 milionë euro.

Asetet e rezervës ndërkombëtare – në fund të muajit prill 2024 shënuan vlerën e 1.24 miliardë eurove, e cila përfaqëson rritje për 81.68 milionë euro krahasuar me muajin paraprak. Kësaj rritje kryesisht i ka kontribuar rritja e depozitave me 96.79 milionë euro, ndërsa investimet në letra me vlerë janë zvogëluar për 15.90 milionë euro.

Sipas kalendarit të publikimeve, BQK publikoi statistikat e bankave komerciale për muajin prill 2024:

https://bqk-kos.org/statistikat/serite-kohore

Asetet e bankave komerciale në fund të muajit prill 2024 kanë arritur vlerën në 7.39 miliardë euro, duke shënuar rënie për 1.28% krahasuar me muajin paraprak, kryesisht për shkak te zvogëlimit të aseteve të ndërlidhura me instrumentet financiare.

Kreditë bruto në fund të muajit prill kanë arritur vlerën në 5.14 miliardë euro, duke shënuar rritje për 54.79 milionë euro ose 1.08% krahasuar me muajin paraprak.

Vlera e kredive të reja në muajin prill 2024 ishte 213.68 milionë euro.

Norma mesatare e interesit në kredi në muajin prill 2024 ishte 6.07% (në mars 2024 ka qenë 6.24%).

Depozitat e klientëve në prill 2024 kanë arritur vlerën prej 6.03 miliardë euro, duke shënuar rënie për 18.27 milionë euro, ose 0.30% krahasuar me muajin paraprak. Nga vlera e akumuluar e depozitave të klientëve, rreth 26.82% janë të afatizuara. Sipas sektorëve, ekonomitë familjare dominojnë me rreth 68.00% të gjithsej vlerës së depozitave (rreth 4.10 miliardë euro).

Vlera e depozitave të reja në muajin prill 2024 ishte 52.54 milionë euro.

Norma mesatare e interesit në depozita në muajin prill 2024 ishte 2.55% (në mars 2024 ka qenë 2.71%).

Margjina e normës së interesit në kredi dhe depozita në muajin prill 2024 ishte 3.53% (në mars 2024 ka qenë 3.53%).

Raporti kredi-depozita në muajin prill 2024 ishte në nivelin 85.23%.

Gjithsej kapitali i bankave komerciale në fund të muajit prill 2024 arriti vlerën në 875.14 milionë euro. Ndërsa, provizionet për kredi u rritën për 1.94 milion euro apo 1.33% krahasuar me muajin paraprak duke arritur vlerën 147.73 milionë euro.

Sipas kalendarit të publikimeve, BQK publikoi statistikat e Bilancit të Pagesave (BP) për muajin mars 2024:

https://bqk-kos.org/statistikat/serite-kohore

Bilanci i pagesave në tremujorin e parë 2024 u karakterizua me deficit të llogarisë rrjedhëse në vlerë prej 295.81 milionë euro, i cili tregoi rritje prej 68.61 milionë euro, krahasuar me periudhën e njëjtë të vitit të kaluar, kryesisht i ndikuar nga rritja e importit të mallrave dhe zbutur nga rritja e llogarisë dytësore.

Bilanci tregtar në mallra për tre muajt e parë të vitit 2024 shënoi deficit në vlerë 1,050.67 milionë euro, i cili është për 11.53% më i lartë krahasuar me periudhën e njëjtë të vitit paraprak. Eksporti për këtë periudhë shënoi vlerën 212.31 milionë euro, duke paraqitur rënie vjetore për 2.09%, ndërsa importi i mallrave shënoi vlerën 1,262.98 milionë euro duke paraqitur rritje vjetore prej 8.98%.

Llogaria e shërbimeve, e cila vazhdimisht ka bilanc pozitiv, në tremujorin e parë 2024 shënoi vlerën 261.89 milionë euro, e cila është për 1.10% më e lartë krahasuar me periudhën e njëjtë të vitit kaluar.

Të ardhurat parësore në periudhën janar-mars 2024 shënuan bilanc pozitiv prej 56.32 milionë euro, e cila në periudhën e njëjtë të vitit të kaluar kishte vlerën 7.54 milionë euro. Rritja e kësaj kategorie është ndikuar pothuajse në të njëjtën peshë nga rritja e kompensimit të punonjësve dhe të ardhurat nga investimet.

Të ardhurave dytësore mbeten kontribuuesi kryesor në zbutjen e deficitit të llogarisë rrjedhëse. Deri në mars 2024 kjo llogari shënoi bilanc pozitiv prej 436.65 milionë euro, e cila paraqet rënie prej 2.60% krahasuar me periudhën e njëjtë të vitit kaluar.

Remitancat janë kategoria kryesore në kuadër të ardhurave dytësore, vlera e të cilave për tre muajt e parë të 2024 shënoi 281.02 milionë euro, e cila përfaqëson rritje prej 9.76 milionë euro ose 3.60% krahasuar me periudhën e njëjtë të vitit 2023.

Asetet në llogarinë financiare në tremujorin e parë të këtij viti kanë shënuar bilanc negativ për 32.74 milionë euro. Ndërsa, detyrimet financiare kanë shënuar bilanc pozitiv në vlerë prej 171.16 milionë euro.

Investimet direkte në Kosovë deri në fund të marsit 2024 ishin 185.39 milionë euro, vlerë pothuajse e njëjtë me atë të vitit paraprak (189.58 milionë euro në TM1 2023), ndërsa investimet direkte jashtë Kosovës shënuan vlerën 39.71 milionë euro (49.14 milionë euro në TM1 2023).

Asetet rezervë deri në mars 2024 kanë arritur vlerën e përgjithshme në 1,162.0 miliardë euro. Vlera e aseteve rezervë në tremujorin e parë të vitit 2024 ka shënuar një zvogëlim prej 18.70 milionë euro, e ndikuar kryesisht nga maturimi i letrave me vlerë.

Sipas kalendarit të publikimeve, BQK publikoi bilancin e gjendjes, pasqyrën e BQK-së dhe asetet rezervë për maj 2024:

https://bqk-kos.org/statistikat/serite-kohore

Asetet e BQK-së në fund të muajit maj 2024 kanë arritur vlerën prej 1.64 miliardë euro, duke shënuar rënie të lehtë prej 0.01% apo për 0.19 milionë euro krahasuar me muajin paraprak, kryesisht si rezultat i zvogëlimit të depozitave të fondeve pensionale dhe Agjencisë Kosovare të Privatizimit. Ndërsa, janë rritur depozitat e Qeverisë së Kosovës, bankave komerciale dhe korporatave publike jo-financiare.

Nga gjithsej asetet, vlera e investimeve në depozita dhe letra me vlerë jashtë vendit deri më 31 maj 2024 ishte 1.15 miliardë euro, e cila krahasuar me muajin paraprak përfaqëson rënie prej 3.51 milionë euro. Prej tyre, investimet në depozita janë rritur për 16.90 milionë euro, ndërsa investimet në letra me vlerë janë zvogëluar për 20.41 milionë euro.

Depozitat në BQK deri më 31 maj 2024 ishin 1.36 miliardë euro, prej të cilëve 537.16 milionë euro ishin Fondet e Buxhetit të Republikës së Kosovës (Llogaria e Thesarit), 522.65 milionë euro nga bankat komerciale, 169.32 milionë euro nga Agjencia Kosovare e Privatizimit dhe 134.02 milionë euro të tjerat.

Kapitali i BQK deri më 31 maj 2024 ishte 112.59 milionë euro.

Asetet e rezervës ndërkombëtare në fund të muajit maj 2024 shënuan vlerën e 1.29 miliardë eurove, e cila përfaqëson rritje për 43.86 milionë euro krahasuar me muajin paraprak, kryesisht ndikuar nga rritja e depozitave.

Sipas kalendarit të publikimeve, BQK publikoi statistikat e bankave komerciale për muajin maj 2024:

https://bqk-kos.org/statistikat/serite-kohore

Asetet e bankave komerciale në fund të muajit maj 2024 kanë arritur vlerën në 7.40 miliardë euro, duke shënuar rritje për 0.25% krahasuar me muajin paraprak, kryesisht për shkak të rritjes së kredive bruto, të cilat në fund të muajit maj kanë arritur vlerën në 5.22 miliardë euro. Krahasuar me muajin paraprak kreditë bruto në maj 2024 janë rritur për 80.99 milionë euro ose 1.58%.

Vlera e kredive të reja në muajin maj 2024 ishte 232.94 milionë euro.

Norma mesatare e interesit në kredi në muajin maj 2024 ishte 6.14% (në prill 2024 ka qenë 6.07%).

Depozitat e klientëve në maj 2024 kanë arritur vlerën prej 6.07 miliardë euro, duke shënuar rritje për 34.78 milionë euro, ose 0.58% krahasuar me muajin paraprak. Nga vlera e akumuluar e depozitave të klientëve, rreth 27.05% janë të afatizuara. Sipas sektorëve, ekonomitë familjare dominojnë me rreth 67.65% të gjithsej vlerës së depozitave.

Vlera e depozitave të reja në muajin maj 2024 ishte 56.24 milionë euro.

Norma mesatare e interesit në depozita në muajin maj 2024 ishte 2.48% (në prill 2024 ka qenë 2.55%).

Margjina e normës së interesit në kredi dhe depozita në muajin maj 2024 ishte 3.65% (në prill 2024 ka qenë 3.53%).

Raporti kredi-depozita në muajin maj 2024 ishte në nivelin 86.08%.

Gjithsej kapitali i bankave komerciale në fund të muajit maj 2024 arriti vlerën në 890.34 milionë euro. Ndërsa, provizionet për kredi u rritën për 0.91 milion euro apo 0.61% krahasuar me muajin paraprak duke arritur vlerën 148.66 milionë euro.

Sipas kalendarit të publikimeve BQK publikoi statistikat: Bilanci Pagesave (BP) për muajin prill 2024, Pozicioni i Investimeve Ndërkombëtare dhe Borxhi i Jashtëm i Kosovës për tremujorin e parë 2024:

https://bqk-kos.org/statistikat/serite-kohore

Bilanci i pagesave deri në fund të muajit prill 2024 u karakterizua me një deficit të llogarisë rrjedhëse në vlerë prej 435.46 milionë euro, i cili tregon rritje prej 122.96 milionë euro krahasuar me periudhën e njëjtë të vitit të kaluar.

Bilanci tregtar në mallra deri në fund prillit 2024 shënoi deficit në vlerë 1,441.59 milionë euro, që është për 11.72% më i lartë krahasuar me periudhën e njëjtë të vitit paraprak. Eksporti për këtë periudhë shënoi vlerën 287.18 milionë euro e që paraqet rënie të lehtë prej 1.05%, ndërsa importi i mallrave shënoi rritje prej 9.79% duke arritur vlerën 1,728.77 milionë euro.

Llogaria e shërbimeve e cila vazhdimisht ka bilanc pozitiv, deri në fund të prillit 2024 shënoi vlerën e 358.02 milionë eurove, që është për 0.58 % më e lartë krahasuar me periudhën e njëjtë të vitit kaluar.

Të ardhurat parësore deri në fund të prillit 2024 shënuan bilanc pozitiv prej 46.55 milionë euro, e cila në periudhën e njëjtë të vitit të kaluar kishte vlerë 17.94 milionë euro dhe tregon për një rritje prej afër 160%.

Të ardhurave dytësore mbetet kontribuuesi kryesor në zbutjen e deficitit të llogarisë rrjedhëse. Deri në prill 2024 kjo llogari shënoi bilanc pozitiv prej 601.56 milionë euro e që paraqet vlerë pothuajse i njëjtë krahasuar me periudhën e njëjtë të vitit kaluar.

Remitancat janë kategoria kryesore në kuadër të ardhurave dytësore, vlera e të cilave deri në prill 2024 shënoi 394.24 milionë euro, që paraqet rritje prej 9.73 milionë euro ose 2.53% krahasuar me periudhën e njëjtë të vitit 2023.

Asetet në llogarinë financiare deri në fund të prillit 2024 kanë shënuar bilanc negativ për 28.56 milionë euro. Ndërsa, detyrimet financiare kanë shënuar bilanc pozitiv në vlerë  prej 260.07 milionë euro.

Investimet direkte në Kosovë deri në fund të prillit 2024 ishin 269.58 milionë euro që paraqet një rritje prej 5.50% krahasuar me periudhën e njëjtë të vitit kaluar, përderisa investimet direkte jashtë Kosovës shënuan vlerën 56.57 milionë euro.

Asetet rezervë deri në fund të prillit 2024 janë rritur për 72.92 milionë euro, rritje pothuajse e njëjtë me atë të vitit paraprak që ishte për 72.70 milionë euro. Rritjes së aseteve rezervë i ka kontribuar rritja e depozitave të cilat gjatë periudhës janar-prill 2024 u rritën për 143.97 milionë euro. Ndërsa investimet në letra me vlerë gjatë kësaj periudhe u zvogëluan për 71.05 milionë euro për shkak të maturimit të disa prej letrave me vlerë.

Pozicioni i investimeve ndërkombëtare në tremujorin e parë 2024, u karakterizuar me rritjen e vlerës së aseteve ndërkombëtare për 62.85 milionë euro dhe detyrimeve ndërkombëtare për 180.87 milionë euro. Vlera e akumuluar e aseteve ndërkombëtare në fund të prillit 2024 shënoi 7.45 miliardë euro, ndërsa vlera e detyrimeve 9.39 miliardë euro.

Rritjes së aseteve ndërkombëtare në tremujorin e parë 2024 i kanë kontribuar kategoria e investimeve direkte për 37.08 milionë euro, investimeve në letra me vlerë për 177.08 milionë euro dhe asetet rezervë me 30.90 milionë euro. Ndërsa, rënie ka shënuar kategoria investimet tjera për 182.21 milionë euro.

Në kuadër të detyrimeve të jashtme, gjatë tremujorit të parë 2024 investimet e huaja direkte në Kosovë janë rritur për 218.47 milionë euro, ndërsa investimet tjera i zvogëluan për 37.60 milionë euro.

Borxhi i jashtëm bruto i cili përfshinë borxhin publik dhe privat në fund të tremujorit të parë 2024, arriti vlerën 3.84 miliardë euro, e cila paraqet rënie prej 12.18 milionë euro krahasuar me tremujorin paraprak. Kontribuuesi kryesor i rënies  së borxhit të jashtëm në Kosovë ishte sektori privat për 17.64 milionë euro, ndërsa borxhi publik u rrit për 5.46 milionë.

Borxhi i sektorit publik në fund të tremujorit të parë 2024 arriti vlerën 874.49 milionë euro duke marrë pjesë me 22.80% në gjithsej borxhin e jashtëm. Pjesa më e madhe e borxhit publik përbëhet nga borxhi i jashtëm i qeverisë, i cili në fund të tremujorit të parë 2024 ishte 704.41 milionë euro.

Borxhi i sektorit privat të tremujorit të parë 2024 arriti vlerën 2.96 miliardë euro. Pjesëmarrësit në borxhin privat janë bankat komerciale (16.13%), kompanitë në relacion të investimeve direkte (31.15%) dhe sektorët tjerë (52.73%).

Sipas kalendarit të publikimeve, BQK publikoi bilancin e gjendjes, pasqyrën e BQK-së dhe asetet rezervë për qershor 2024:

https://bqk-kos.org/statistikat/serite-kohore

Asetet e BQK-së në fund të muajit qershor 2024 kanë arritur vlerën prej 1.71 miliard euro, duke shënuar rritje për 62.46 milionë euro krahasuar me muajin paraprak, kryesisht si rezultat i rritjes të depozitave të bankave komerciale, fondeve pensionale, depozitave të Qeverisë së Kosovës dhe Agjencisë Kosovare të Privatizimit. Ndërsa, janë zvogëluar depozitat e korporatave publike jofinanciare.

Nga gjithsej asetet, vlera e investimeve në depozita dhe letra me vlerë jashtë vendit deri më 30 qershor 2024 ishte 1.21 miliardë euro, e cila krahasuar me muajin paraprak përfaqëson rritje prej 53.22 milionë euro. Prej tyre, investimet në depozita janë rritur për 36.46 milionë euro, ndërsa investimet në letra me vlerë janë rritur për 16.77 milionë euro.

Depozitat në BQK derimë 30 qershor 2024 ishin 1.42 miliard euro, prej të cilëve 549.06 milionë euro nga Buxheti i Republikës së Kosovës (Llogaria e Thesarit), 554.90 milionë euro nga bankat komerciale, 170.64 milionë euro nga Agjencia Kosovare e Privatizimit dhe 145.54 milionë euro të tjerat.

Kapitali i BQK-së deri më 30 qershor 2024 ishte 104.42 milionë euro.

Asetet e rezervës ndërkombëtare në fund të muajit qershor 2024 shënuan vlerën e 1.32 miliard euro, e cila përfaqëson rritje për 29.47 milionë euro krahasuar me muajin paraprak, ndikuar nga rritja e investimeve në depozita për 15.18 milionë euro dhe investimeve në letra me vlerë për 11.77 milionë euro.