Arta Hoxha

Znj. Arta Hoxha është anëtare e Bordit të Bankës Qendrore të Republikës së Kosovës dhe njëkohësisht Kryesuse e Komitetit për Qeverisje, Etikë dhe Burime Njerëzore. Përmes një procesi të hapur aplikimi, ajo u zgjodh në listën e ngushtë dhe u votua nga Kuvendi i Kosovës, pasuar nga dekreti i Presidentes në maj  2023.

Nga viti 2018 deri në vitin 2023, ajo ka shërbyer si anëtare e pavarur e Bordit të Drejtorëve të Fondit Kosovar për Garanci Kreditore, e emëruar nga KfW dhe USAID.

Znj. Hoxha ka përfunduar doktoraturën në Ekonomi në Universitetin Staffordshire në Mbretërinë e Bashkuar, me fokus në ndikimin e krizës financiare globale në vendet e tranzicionit në Evropë. Për kontributin e saj akademik, ajo është vlerësuar me çmimin prestigjioz Olga Radzyner nga Banka Kombëtare Austriake.

Përveç arritjeve akademike, znj. Hoxha ka përvojë të gjerë profesionale në projekte auditimi dhe këshillimi me KPMG, ProCredit Bank në Kosovë dhe Grant Thornton. Përvoja e saj përfshin ofrimin e shërbimeve të auditimit dhe këshillimit për institucionet qeveritare në nivelet qendrore dhe lokale; kompani private dhe publike; banka dhe institucione mikrofinanciare; kompani sigurimesh; institucione ndërkombëtare/agjenci qeveritare dhe OJQ. Që nga viti 2018, ajo është pjesë e Agjencisë së Luksemburgut për Zhvillim, duke mbikëqyrur formulimin, implementimin, monitorimin dhe mbylljen e projekteve të financuara nga Qeveria e  Luksemburgut në disa sektorë në Kosovë.

Znj. Hoxha ka kryesuar disa komitete auditimi në institucione të ndryshme, duke theksuar përkushtimin e saj ndaj integritetit, pajtueshmërisë dhe menaxhimit të rrezikut. Ndër kontributet e saj të rëndësishme është pjesëmarrja në hartimin e dokumentit konceptual për krijimin e Fondit Sovran të Republikës së Kosovës.

Përveç kësaj, ajo ka mbi tre vjet përvojë në mësimdhënien e lëndëve ekonomike në Kolegjin AAB, Universitetin e Prishtinës dhe Universitetin e Prizrenit në Kosovë.