Zëvendësguvernatori Fusha pjesë e panelit për rolin e parasë digjitale në luftimin e evazionit tatimor në kuadër të Javës Globale të Parasë

Banka Qendrore e Republikës së Kosovës (BQK) u përfaqësua nga Zëvendësguvernatori për Operacione Bankare, z. Dardan Fusha, në panelin diskutues të organizuar nga Kolegji AAB, në kuadër të aktiviteteve të Javës Globale të Parasë, me temën “Roli i parasë digjitale në luftimin e evazionit tatimor”.

Paneli mblodhi përfaqësues të institucioneve dhe ekspertë të sektorit financiar, duke ofruar një platformë për diskutim mbi zhvillimet e fundit në digjitalizimin e pagesave dhe ndikimin e tyre në rritjen e transparencës dhe formalizimin e ekonomisë. I organizuar në kuadër të Javës Globale të Parasë, ky aktivitet u ndoq nga një audiencë e angazhuar studentësh, duke dëshmuar interes të lartë për temën. Në panel morën pjesë edhe përfaqësues nga Administrata Tatimore e Kosovës dhe sektori financiar, të cilët ndanë perspektivat e tyre mbi zhvillimet, sfidat dhe mundësitë në këtë fushë.

Gjatë diskutimit, z. Fusha prezantoi zhvillimet kryesore në sistemin financiar në Republikën e Kosovës, me theks të veçantë në rolin transformues të pagesave digjitale në rritjen e efikasitetit, sigurisë dhe transparencës në ekonomi. Ai theksoi se avancimi i instrumenteve digjitale të pagesave kontribuon drejtpërdrejt në rritjen e gjurmueshmërisë së transaksioneve, duke forcuar integritetin e sistemit financiar dhe duke mbështetur përpjekjet për luftimin e ekonomisë informale dhe evazionit tatimor.

Në këtë kontekst, z. Fusha nënvizoi rëndësinë strategjike të projekteve që po zhvillon BQK, përfshirë integrimin në SEPA dhe zhvillimin e sistemit të pagesave të shpejta me Bankën e Italisë, platformën TIPS Clone. Ai theksoi se këto iniciativa do të mundësojnë pagesa më të shpejta, më të sigurta dhe me kosto më të ulët, duke rritur përdorimin e pagesave digjitale dhe duke krijuar një mjedis më transparent financiar, ku lehtësohet qarkullimi financiar dhe aktivitetet ekonomike janë më lehtë të monitorueshme.

Zëvendësguvernatori Fusha theksoi gjithashtu se zgjerimi i qasjes në infrastrukturat e pagesave, përfshirë ofruesit jo-bankarë të shërbimeve të pagesave, do të rrisë konkurrencën dhe inovacionin në treg, duke kontribuar në përfshirjen financiare dhe reduktimin e përdorimit të parasë së gatshme.

BQK mbetet e përkushtuar për të mbështetur zhvillimin e një ekosistemi modern të pagesave, në përputhje me standardet evropiane dhe praktikat më të mira ndërkombëtare, duke kontribuar në një ekonomi më transparente, më efikase dhe më të formalizuar.