Guvernatori Ismaili pritet në Bruksel nga Kryetari i Bordit të Autoritetit Evropian të Përmbylljes së Bankave (SRB), z. Dominique Laboureix

Guvernatori i Bankës Qendrore të Republikës së Kosovës (BQK), z. Ahmet Ismaili, zhvilloi një takim zyrtar me Kryetarin e Bordit të Autoritetit Evropian të Përmbylljes së Bankave (Single Resolution Board – SRB), z. Dominique Laboureix, dhe Anëtaren e Bordit dhe Drejtoreshën për Zhvillimin dhe Koordinimin e Politikave të Përmbylljes, znj. Karen Braun-Munzinger, në selinë e Autoritetit Evropian të Përmbylljes së Bankave në Bruksel.

Gjatë takimit, Guvernatori Ismaili prezantoi zhvillimet më të fundit në sektorin financiar të Kosovës, duke theksuar iniciativat kryesore të BQK-së për forcimin e stabilitetit financiar, reformimin e mbikëqyrjes bankare, modernizimin e infrastrukturës së pagesave dhe kornizën për mbrojtjen e konsumatorit, si dhe themelimin e funksionit të Përmbylljes në përputhje me legjislacionin e BE-së. Ai gjithashtu paraqiti një përditësim mbi procesin e para-aplikimit për anëtarësimin në SEPA dhe progresin në zbatimin e një sistemi të pagesave në kohë reale në bashkëpunim me Banca d’Italia.

Diskutimet u përqendruan në forcimin e bashkëpunimit për të harmonizuar kornizën rregullative dhe mbikëqyrëse të Kosovës me standardet e Bashkimit Evropian. Fokus i veçantë iu kushtua stabilitetit financiar, përmbylljes së bankave dhe mbrojtjes së konsumatorit, duke theksuar ndërtimin e kapaciteteve dhe harmonizimin ligjor në fushën e përmbylljes së bankave, në përputhje me praktikat më të mira të BE-së.

Guvernatori Ismaili shprehu mirënjohjen për mundësinë e realizimit të këtij takimi të parë të nivelit të lartë dhe mirëpriti gatishmërinë e SRB-së për të mbështetur Kosovën për zhvillimin e kornizës së përmbylljes. Ai rikonfirmoi përkushtimin e BQK-së për të forcuar bashkëpunimin në zhvillimin e një rregullative prudente, praktikave të shëndosha të tregut dhe mekanizmave adekuate për mbrojtjen e konsumatorit.

BQK mbetet e përkushtuar për bashkëpunim të ngushtë me institucionet e BE-së me qëllim të harmonizimit të kornizës rregullative dhe integrimit të mëtejshëm në sistemin financiar evropian.