Guvernatori i BQK-së takohet me Drejtorin e MCM të FMN-së z. Tobias Adrian, rikonfirmon bashkëpunimin strategjik në forcimin e stabilitetit financiar

Guvernatori i Bankës Qendrore të Republikës së Kosovës (BQK), z. Ahmet Ismaili, zhvilloi një takim të nivelit të lartë me z. Tobias Adrian, Krye Financier dhe Drejtor i Departamentit për Tregjet Monetare dhe të Kapitalit (MCM) në Fondin Monetar Ndërkombëtar (FMN), gjatë vizitës së tij zyrtare në Washington, D.C., pas përfundimit të Takimeve Pranverore 2025 të FMN-së dhe Bankës Botërore.

Gjatë takimit, Guvernatori Ismaili dhe z. Adrian diskutuan mbi zhvillimet aktuale ekonomike globale dhe patën një dialog konstruktiv mbi bashkëpunimin e shkëlqyeshëm dhe të vazhdueshëm ndërmjet BQK-së dhe Departamentit MCM të FMN-së. Diskutimi nënvizoi rëndësinë e qëndrueshmërisë makro-financiare, avancimit rregullativ dhe zhvillimit të kuadrove moderne për sektorin financiar të përshtatura për nevojat në ndryshim të Kosovës.

Guvernatori Ismaili shprehu mirënjohje të thellë për ekspertizën teknike dhe mbështetjen e vazhdueshme të ofruar nga z. Adrian dhe ekipi i tij, të cilat kanë kontribuar ndjeshëm në forcimin e sistemit financiar të Kosovës, rritjen e kapaciteteve rregullative dhe përmirësimin e qeverisjes institucionale.

Takimi rikonfirmoi angazhimin e përbashkët për të vazhduar bashkëpunimin e ngushtë në fusha si mbikëqyrja e bazuar në rrezik për sektorin financiar, parapërgatitja për rastet e krizave, siguria kibernetike dhe zbatimi i standardeve me te mira ndërkombëtare. BQK dhe MCM diskutuan gjithashtu mundësitë e ardhshme për zgjerimin e programit të bashkëpunimit teknik në mbështetje të zhvillimit afatgjatë të sektorit financiar në Kosovë.

BQK mbetet e përkushtuar për të punuar ngushtë me partnerët ndërkombëtarë, përfshirë FMN-në, në ndërtimin e një sistemi financiar të qëndrueshëm, gjithëpërfshirës dhe të gatshëm për të ardhmen, që mbështet rritjen ekonomike dhe stabilitetin makroekonomik.