News Categories: BQK

Temë diskutimi me ekipin e Bankës Botërore ishte Memorandumi Ekonomik i Vendit (Country Economic Memorandum) si dhe perspektiva dhe sfidat në të ardhmen lidhur me zhvillimin ekonomik të vendit.

Guvernatori Mehmeti shpalosi pikëpamjet e Bankës Qendrore lidhur me perspektiven e zhvillimit ekonomik në përgjithësi dhe rolin e sektorit financiar si kontribuues kyç në financimin e ekonomisë, në veçanti.
Gjithashtu, njoftoi ekipin e Bankës Botërore për performancën e mirë të  sektorit financiar në Kosovë, dhe potencoi rendësin e këtij sektori  në mbështetjen e zhvillimit të qëndrueshëm ekonomik të vendit.  Guvernatori Mehmeti falënderoi Bankën Botërore për ndihmën dhe bashkëpunimin e shkëlqyeshëm dhe shprehu gatishmërinë që ky bashkëpunim të vazhdojë edhe më tutje.

Nga ana tjetër, drejtori i BB-së për Kosovën dhe Maqedoninë e Veriut, Marco Mantovanelli tha se institucioni që e drejton do të vazhdojë të mbajë në nivel të lartë bashkëpunimin me BQK-në, në realizimin e projekteve që për qëllim kryesor kanë zhvillimin e vazhdueshëm të sektorit financiar.

Pas situatës së krijuar si rezultat i #Covid19, Banka Qendrore e Republikës së Kosovës ju njofton se të gjitha Bankat e Kosovës janë duke funksionuar normalisht, ashtu sikur edhe zonat 24/7 dhe bankomatët. Këto hapësira janë duke u dezinfektuar rregullisht nga ana e bankave, por duke pasur parasysh masat mbrojtëse të rekomanduara si pjesë e parandalimit të shpërndarjes së virusit, ju lutemi që degët bankare t’i shfrytëzoni sa më rrallë dhe të përdorni më tepër kartelat bankare, dhe kanalet elektronike për të kryer shërbimet tuaja bankare.

BQK-ja është duke vërejtur se po shpërndahen lajme të rrejshme sa i përket funksionimit të sektorit bankar në vend.

Duke marrë për bazë këto lajme të rrejshme, BQK-ja ju informon se sektori bankar është mirë i kapitalizuar dhe shumë likuid, si dhe në të njëjtën kohë është duke funksionuar normalisht dhe do të vazhdojë të funksionojë sado që të zgjasë emergjenca shëndetësore. 
Njëkohësisht, BQK-ja ju bën thirrje qytetarëve dhe mediave të mos bien pre e këtyre thirrjeve dhe lajmeve të rrejshme.

Ju njoftojmë që si rrjedhojë e masave të marra nga Qeveria e Republikës së Kosovës për parandalimin e shpërndarjes së virusit COVID-19, të gjitha procedurat për rekrutim të punonjësve të rinjë, janë pezulluar deri në një njoftim të dytë

Mbështetur në vendimet Bordit të BQK-së, Bordit Ekzekutiv të BQK-së dhe në dakordim me Shoqatën e Bankave të Kosovës, gjithnjë bazuar në situatën e krijuar në vend si rezultat i pandemisë me virusin Covid 19, kredimarrësit që janë në pa mundësi për pagesë të këstit të kredisë do të mund të mos e paguajnë këstin e tyre nga data 16 mars 2020 deri më datë 30 prill 2020. 

Secili kredimarrës që është në pamundësi për pagesë të këstit në periudhën si më sipër duhet të bëjë kërkesë te kredi dhënësi për një gjë të tillë përmes adresës elektronike apo përmes telefonit, dhe kërkesat e tilla do të aprovohen.

Këstet e papaguara do të jenë subjekt i pagesës pas kalimit të situatës së krijuar, që nënkupton që afati i maturimit të kredisë do të shtyhet gjithashtu për një muaj! 

I inkurajojmë të gjithë kredimarrësit që këtë të drejtë ta shfrytëzojnë në mënyrë racionale meqë funksionimi efikas i sistemit financiar është jetik dhe esencial në rrethanat të cilat po kalon vendi.

Bordi i Bankës Qendrore të Republikës së Kosovës, në mbledhjen e mbajtur më 26 mars 2020,  mori vendimet si në vijim: 

• Vendim për miratimin e Rregullores për Raportimin e Bankave;
•  Vendim për miratimin e Rregullores për Teknologji të Informacionit për Banka.

Gjithashtu, Bordi i Bankës Qendrore u njoftua me Raportin mujor të Guvernatorit/Bordit Ekzekutiv.

Guvernatori i Bankës Qendrore të Republikës së Kosovës, Fehmi Mehmeti, i është përgjigjur pozitivisht ftesës së ministrit të Financave dhe Transfereve, Besnik Bislimi, për pjesëmarrje në takimin konsultues rreth “Pakos për Rimëkëmbjen e Ekonomisë”.

Në këtë takim bashkë me Guvernatorin janë ftuar edhe të gjithë ish-ministrat e financave të Republikës së Kosovës.

Banka Qendrore e Republikës së Kosovës e kryesuar nga Guvernatori Mehmeti, që nga fillimi i paraqitjes së krizës pandemike ka bashkëpunuar ngushtë me të gjitha institucionet vendore dhe ndërkombëtare, me qëllim që ekonomia jonë ta përballojë sa më lehtë këtë krizë.

Ashtu siç e kemi sqaruar edhe në komunikimet e mëhershme me publikun, BQK-ja ka ndërmarrë një varg masash për ta ndihmuar ekonominë e Kosovës.

Banka Qendrore e Republikës së Kosovës është duke i përcjellë të gjitha zhvillimet dhe është e gatshme për veprime të mëtutjeshme për ta ndihmuar ekonominë e vendit.

Banka Qendrore e Republikës së Kosovës është informuar me kohë nga Banka Ekonomike lidhur me sulmin kibernetik duke ndikuar në funksionalitetin e disa shërbimeve bankare, të cilat më pastaj bazuar në konfirmimin e bankës, këto shërbime bankare janë kthyer në gjendje normale.

Me këtë rast, Banka Ekonomike ka informuar edhe organet shtetërore, të cilat merren me siguri kibernetike dhe me çështje të të dhënave personale. 

Konform fushëveprimit dhe mandatit të BQK-së, ju informojmë që mjetet në llogaritë e klientëve janë të sigurta, por që sulmi kibernetik ka të bëjë me rrjedhje të informatave që lidhen me fushën e privatësisë.

Banka në fjalë, tashmë ka ndërmarrë hapat konkret në kontekst të hulumtimit dhe eliminimit të këtij sulmi kibernetik.

Po ashtu, BQK përcjellë në vazhdimësi stabilitetin e sektorit bankar dhe të bankave individuale, e që bazuar në treguesit kryesor financiar sektori bankar është stabil.

Bordi i Bankës Qendrore të Republikës së Kosovës, në mbledhjen e mbajtur më 30 prill 2020, ka diskutuar çështjet që kanë të bëjnë situatën aktuale në sistemin financiar të Kosovës në përgjithësi dhe sistemin bankar në veçanti, si rezultat i situatës së krijuar për shkak të pandemisë Covid 19,  si dhe menaxhimin e kësaj situate nga ana e Bankës Qendrore të Republikës së Kosovës dhe rëndësisë së funksionimit efikas të BQK-së gjatë kësaj periudhe.

Në këtë takim nga ana e Bordit të BQK-së u trajtua raporti mujor i Guvernatorit/Bordit Ekzekutiv të BQK-së dhe raporti i veçantë i Guvernatorit lidhur me menaxhimin e situatës për shkak të pandemisë dhe funksionimit të BQK-së.

Mbështetur në raportimet e mësipërme, Bordi i BQK-së konsideron se sektori financiar në vend vazhdon të ketë performancë të qëndrueshme, të jetë mirë i kapitalizuar, likuid, stabil dhe funksional në ofrimin e shërbimeve për qytetarët e vendit.

Në të njëjtën kohë, Bordi i BQK-së është informuar mbi funksionalitetin e plotë të BQK-së gjatë kësaj periudhe, në kuptim të përmbushjes së objektivave dhe detyrave të përcaktuara me legjislacionin në fuqi, si dhe në përmbushjen në mënyrë efikase të detyrave shtesë për menaxhimin e situatës nga efektet e pandemisë Covid 19.

Bordi i BQK-së mbështet Guvernatorin dhe menaxhmentin e BQK-së në ndërmarrjen e veprimeve të nevojshme në mbështetje të Qeverisë dhe mekanizmave tjerë vendorë dhe ndërkombëtarë për tejkalimin sa më suksesshëm të kësaj situate.

Gjithashtu, në këtë takim Bordi i BQK-së ka miratuar rregullore të rëndësishme, të cilat mundësojnë funksionim më efikas të sistemit financiar në vend dhe me ndikim të drejtpërdrejtë në mbështetjen e rimëkëmbjes dhe zhvillimin e ekonomisë së vendit.

Bordi i Bankës Qendrore të Republikës së Kosovës, në mbledhjen e mbajtur më 30 prill 2020,  mori vendimet si në vijim:

• Vendim për miratimin e Rregullores për Licencimin e Bankave dhe Degëve të Bankave të Huaja;
• Vendim për miratimin e Rregullores për Regjistrimin e Institucioneve Financiare Jobankare;
• Vendim për miratimin e Rregullores për Licencimin e Siguruesve dhe Degëve të Siguruesve të Jashtëm;
• Vendim për miratimin e Rregullores për Licencimin e Ndërmjetësuesve në Sigurime;
• Vendim për miratimin e Rregullores për Huadhënie Brenda ditore dhe Njëditore;
• Vendim për miratimin e Pasqyrave Financiare të BQK-së për tremujorin e parë të vitit 2020.

Gjithashtu, Bordi i Bankës Qendrore u njoftua me Raportin Vjetor të Auditimit të Brendshëm për vitin  2019 dhe Raportin mujor të Guvernatorit/Bordit Ekzekutiv.