Konkurs për Lojë Edukative

Banka Qendrore e Republikës se Kosovës (BQK) shpall konkurs për nxënësit e klasave X-XII të shkollave të arsimit të mesëm të lartë në Kosovë, për realizimin e një loje edukative ose kuizi edukativ, i cili mund të zhvillohet si platformë digjitale (web), e realizuar përmes teknologjive të ndryshme, bazuar në njërën nga temat e mëposhtme:

· Menaxhimi i financave personale, buxheti, kursimi dhe planifikimi financiar

· Siguria financiare dhe parandalimi i mashtrimeve

· Zgjedhja e duhur dhe përdorimi i produkteve dhe shërbimeve financiare

· Roli i Bankës Qendrore dhe i sistemit bankar (vetëm në formë të kuizit edukativ)

Për qëllime orientuese, nxënësit mund të zhvillojnë, ndër të tjera, lojëra ose kuize edukative si:

– një lojë kreative për menaxhimin e buxhetit personal, ku lojtari merr vendime mujore për shpenzime, kursime dhe prioritete financiare;

– një lojë për kursimin dhe planifikimin financiar, ku lojtari synon të arrijë një qëllim (p.sh. blerje, udhëtim, studime) përmes vendimeve të zgjuara financiare, si individ apo edhe si familje;

– një lojë të thjeshtë edukative për investime, ku lojtari mëson dallimin mes kursimit, investimit dhe rrezikut, përmes skenarëve simulues;

– një lojë ose kuiz për sigurinë financiare, ku lojtari identifikon mashtrime, oferta të rreme ose sjellje të pasigurta financiare;

– një lojë edukative për zgjedhjen e produkteve dhe shërbimeve financiare, ku krahasohen llogari bankare, kredi, karta apo shërbime digjitale;

– një kuiz edukativ mbi rolin e Bankës Qendrore dhe sektorin financiar, funksionet kryesore dhe rëndësinë e stabilitetit financiar.

Qëllimi i konkursit

Qëllimi i këtij konkursi është të nxisë pjesëmarrjen aktive të të rinjve në edukimin financiar, të kontribuojë në ngritjen e njohurive për menaxhimin e parave dhe vendimmarrjen financiare, si dhe të inkurajojë krijimin e lojërave ose kuizeve edukative të bazuara në tema e koncepte ekonomike e financiare, të kuptueshme dhe të përshtatshme për publikun e gjerë.

Vlerësimi dhe çmimet

Lojërat e pranuara do të vlerësohen nga një komision i posaçëm, i cili do të përzgjedhë pesë (5) lojërat më të mira, të cilat do të shpërblehen si më poshtë:

· Çmimi i parë: 600 euro

· Çmimi i dytë: 500 euro

· Çmimi i tretë: 400 euro

· Çmimi i katërt: 300 euro

· Çmimi i pestë: 200 euro

Rregullat e pranimit dhe kriteret e vlerësimit

· Loja mund të realizohet individualisht ose në grup.

· Loja duhet të jetë punë origjinale dhe kreative, që përcjell qartë mesazhin e temës së zgjedhur.

· Loja duhet të ketë cilësi të përshtatshme vizuale dhe audio për përdorim edukativ.

· Loja duhet të jetë kreative dhe tërheqëse për audiencën.

· Loja duhet të jetë në gjuhën shqipe, serbe ose angleze.

· Kohëzgjatja e lojës/kuizit nuk duhet të tejkalojë 5 minuta për t’u luajtur.

Dorëzimi i punimeve

· Nxënësit duhet të vendosin një emër për lojën / kuizin e tyre, i cili është i qartë, i kuptueshëm dhe i përshtatshëm për publikun e gjerë.Loja duhet të dorëzohet në formë digjitale, si fajll i kompresuar (.ZIP) që përmban të gjithë materialin e nevojshëm për funksionimin e saj (HTML, CSS, JavaScript, media, etj.)

· Madhësia maksimale e fajllit për dorëzim nuk duhet të tejkalojë 200 MB.

· Loja duhet të jetë plotësisht funksionale, pa nevojë për instalime shtesë apo programe të licencuara.

· Së bashku me lojën, duhet të dorëzohet edhe një dokument shoqërues (PDF ose DOCX, max. 2 faqe) që përmban:

– Emrin e lojës

– Përshkrim të shkurtër të idesë dhe temës

– Udhëzime të shkurtra për përdorim

– Emrin e autorit/autorëve, shkollën dhe klasën

– Kontaktin

· Punimet dorëzohen: përmes emailit: [email protected], ose përmes platformës: https://wetransfer.com

Për:

Departamentin e Marrëdhënieve me Publikun dhe Edukim Financiar

Banka Qendrore e Republikës së Kosovës

Rr. Luan Haradinaj nr.2 Prishtinë, Kosovë

Informacione shtesë

· Pjesëmarrësit garantojnë se punimi i dorëzuar është punë origjinale dhe se nuk cenon të drejtat e autorit të palëve të treta.

· Lojërat fituese do të kalojnë në pronësi të BQK-së dhe do të përdoren si materiale edukative.

· Pas përfundimit të procesit të vlerësimit, do të kontaktohen vetëm nxënësit fitues.

· BQK rezervon të drejtën që të mos ndajë të gjitha çmimet, nëse komisioni vlerëson se punimet nuk i përmbushin kriteret e përcaktuara

· Data e fundit për dorëzim: 04 mars 2026

Suksese të gjithëve!