Grup nxënësish të Shkollës Finlandeze vizituan Bankën Qendrore të Republikës së Kosovës

Banka Qendrore e Republikës së Kosovës (BQK) mirëpriti një grup nxënësish nga Shkolla Finlandeze në Kosovë (The Finnish School of Kosovo), nxënësit vinin nga klasat e shkollës së mesme të këtij institucioni. Vizita u organizua në kuadër të aktiviteteve për edukim financiar, duke u mundësuar nxënësve të njihen nga afër me funksionimin e institucionit kryesor financiar të vendit.

Gjatë aktivitetit, nxënësit u pritën nga Departamenti për Marrëdhënie me Publikun dhe Edukim Financiar , i cili ka për mision ngritjen e njohurive financiare dhe ekonomike tek qytetarët e të gjitha moshave.

Më pas, bashkëbisedimi i Guvernatorit të Bankës Qendrore të Republikës së Kosovës, z. Ahmet Ismaili, zgjoi interesim dhe ishte pjesë e veçantë e vizitës me nxënësit e klasave të dhjeta dhe të njëmbëdhjeta të Shkollës Finlandeze.

Gjatë diskutimeve u trajtuan një sërë temash me rëndësi për edukimin financiar të të rinjve, duke përshirë:

• Funksionimin dhe rolin e Bankës Qendrore të Republikës së Kosovës – Nxënësit u njohën me përgjegjësitë kryesore të BQK-së, përshirë mbikëqyrjen dhe ruajtjen e stabilitetit financiar.
• Financat personale – U diskutua mbi rëndësinë e planifikimit financiar dhe menaxhimit të duhur të financave në jetën e përditshme.
• Organizimi i buxhetit – Nxënësit morën informacione mbi menaxhimin e duhur të buxhetit personal dhe familjar.
• Qëllimet financiare – U theksua domosdoshmëria e vendosjes së objektivave financiare dhe hapat e nevojshëm për realizimin e tyre.
• Kursimet dhe shmangia e blerjeve impulsive – Guvernatori nënvizoi rëndësinë e kursimeve si një mjet për stabilitet financiar dhe nevojën për shmangien e shpenzimeve të panevojshme.

Gjatë bashkëbisedimit me Guvernatorin, nxënësit shtruan pyetje dhe u angazhuan në diskutime mbi tema si digjitalizimi, inovacionet në sektorin bankar, metodat bashkëkohore të pagesave dhe hapja e llogarive bankare në Kosovë. Nxënësit u treguan tejet interaktiv dhe të interesuar për të fituar njohuri të reja në fushën e financave.

Zyrtaret e edukimit financiar në BQK i udhëzuan nxënësit që të ndjekin faqen e BQK-së, atë të edukimit financiar dhe rrjetet sociale për t’u njohur me të rejat e fundit në sektor si dhe të bëhen pjesë e aktiviteteve që në vazhdimësi zhvillon BQK-ja nga sfera e edukimit financiar.

Banka Qendrore e Republikës së Kosovës do të vazhdojë organizimin e vizitave të ngjashme në të ardhmen, duke përshirë grupe të ndryshme të qytetarëve, me qëllim rritjen e njohurive financiare dhe për të kontribuar për një të ardhme financiare më të informuar dhe të qëndrueshme për të gjithë.