20/06/2018

Drejtori i GIZ-it, z. David Oberhuber vizitoi sot Bankën Qendrore të Republikës së Kosovës, ku u prit nga Guvernatori z. Fehmi Mehmeti.

Me këtë rast, Guvernatori Mehmeti përgëzoi z. Oberhuber për pozitën e tij të re dhe i uroi mirëseardhje në Republikën e Kosovës.
Në këtë takim, Guvernatori e njoftoi atë rreth zhvillimeve në sektorin financiar të vendit, duke theksuar rritjen e aktivitetit të këtij sektori në mbështetje të zhvillimit ekonomik të vendit dhe shkallën e lartë të qëndrueshmërisë së arritur nga ky sektor.
Guvernatori z. Mehmeti shprehu vlerësimin e tij të madh për mbështetjen e vazhdueshme nga Qeveria Gjermane për zhvillimin institucional të BQK-së dhe për progresin ekonomik të vendit në përgjithësi.
Guvernatori z. Mehmeti theksoi përkushtimin e tij të vazhdueshëm në avancimin e të gjitha funksioneve të BQK-së krahas synimit të qartë për të forcuar edhe më tej bashkëpunimin e shkëlqyeshëm me zyrën e GIZ-it në Republikën e Kosovës.

Drejtori i GIZ-it, David Oberhuber përgëzoi Guvernatorin z. Mehmeti për zgjedhjen e tij në postin e Guvernatorit dhe inkurajoi BQK-në që të vazhdoj rrugën e saj në rregullimin dhe mbikëqyrjen e sektorit financiar si dhe ruajtjen e rolit të saj në sigurimin e stabilitetit të këtij sektori.